مصر

                                                  مصر

                                    

   - مصر :-   

 -دوله افريقية اراضيها ف قارتين, الغرب ف شمال افريقيا و الشرق ف غرب اسيا ,اهلها بيتكلموا مصرى , دينها الرسمي الاسلام ((الإسم الرسمى للدولة الحالية هو جمهورية مصر العربية من سنة 1971, اسامى الدولة قبل كده كان من ضمنها السلطنة المصرية و المملكة المصرية و الجمهورية المصرية و الجمهورية العربية المتحدة, فيه بيطالبو بالرجوع لإسم الجمهورية المصرية أو جمهورية مصر)).                                                                                

 - مصر عدد سكانها من أكبر تعدادات سكان الدول فى أفريقيا, و حسب اخر التقديرات, عدد سكان مصر عدا ال100 مليون انسان (100 مليون جوه مصر و الباقى بره), و ترتيبها الخامس عشر على مستوى العالم من أصل 242 دولة من حيث عدد السكان, بيعيش اغلبهم على ضفاف النيل اللى مساحة الوادى بتاعه حوالى 40,000 كيلو متر مربع. الصحرا بتشكل أغلب مساحتها و هى مش معموره. معظم السكان فى مصر (حوالى نصهم) دلوقتى من الحضر بيعيشو فى مدن, ربعهم فى مدينة القاهره, أكبر مدينه فى افريقيا و الشرق الأوسط و كمان فيه نسبه كبيره فى مدينة الاسكندرية و فى الدلتا. مصر ليها شهره عالميه بسبب تاريخها من أيام الحضارة المصرية القديمة اللى سابوا لمصر و للعالم اروع الاثار زى الاهرمات و ابو الهول و معبد الكرنك و وادى الملوك فى مدينة الاقصر . مصر كمان ليها دور مهم جداً فى الشرق الأوسط و خصوصا على المستوى الثقافى و السياسى.                                                                                                                                                                                            

                                                                                                                                                                                                                                                                                                                                                          

                                                                                                                                                                       -- مصر بلد موجوده فى شمال شرق قارة افريقيا بيحدها من الشمال البحر المتوسط و من الشرق البحر الاحمر مساحة مصر حوالى مليون كيلومتر مربع. مصر دوله افريقية ولكن تضم جزء اسياوى وهى شبة جزيرة سيناء, فى قارة اسيا فعشان كده مصر بتعتبر دولة عابرة القارات..

مصر ليها حدود من الغرب مع لبيا و من الجنوب مع السودان و من الشمال الشرقى مع فلسطين المحتلةو البحر الاحمر بيفصلها عن الأردن و السعوديه, و قناة السويس اللى بتفصل جزءها اللى فى اسيا عن اللى فى أفريقيا.

من الوجهه الجغرافيه الطبيعيه من العصور الفرعونيه لغاية النهارده بتنقسم الأراضى المصريه لقسمين رئيسيين : الوجه البحرى اللى بيمتد فى شمال القاهره على شكل مروحه و بينهى حده البحرى عند البحر المتوسط و بيتسمى مصر السفلى. و الوجه القبلى اللى بيمتدعلى ضفتين النيل من جنوب القاهره لغاية حدود مصر الجنوبيه و بيتسمى مصر العليا أو صعيد مصر (الصعيد).                                                                                                                                                                                                                  - مصر هى اقدم دوله موجوده فى العالم المعاصر. الدوله بمفهومها القانونى يعنى ارض و شعب و حكومه. على مدى أكتر من 7000 سنه و مصر موجوده بحدودها الجغرافيه المعروفه دلوقتى و عاشت و استمرت و على ارضها عايش شعبها و طول الوقت ليها حكومه من غير انقطاع فى أى حقبه من حقب التاريخ. جايز كانت فيه شعوب و قبايل قديمه عاشت من الاف السنين لكن مش ممكن تسميتهم دول و حتى لو اتوجدت دوله ليهم فماعاشتش زى الدوله المصريه و ما سابتش حاجه تثبت وجودها. الحضاره المصريه القديمه وصلتنا اخبارها عن طريق نصوص موثقه مكتوبه على البرديات و جدران المعابد. عبر التاريخ الدوله المصريه حاجه مميزه عن كل الدول التانيه و من الصعب تعريفها حيث انها لا هى الحاكم ، الفرعون او السلطان او الملك او الرئيس ، و لا هى الجيش و لا هى الشعب ، لكن مجموعة نظم متشابكه و متداخله مالهاش مثيل فى دول تانيه ، و مجموعه من الروح و الإراده و المؤسسات و الهويه و حاجات تانيه كتيره بتميز المصريين و دولتهم و بتديهم طابع معين عن كل شعوب الدنيا و دولهم.

فيه ادله عن ان الانسان سكن وادى النيل من العصر الحجرى فى شكل اعمال فنيه و منحوتات صخريه على طول نهر النيل و الواحات فى الصحرا. فى الالفيه العاشره قبل الميلاد, ابتدت فى مصر ثقافه الصيادين و صيادين السمك و طحن الحبوب. التغيرات المناخيه و / او الافراط فى الرعى حوالى 8000 قبل الميلاد ابتدا يجفف الاراضى الرعويه و مصر, و اتشكلت الصحرا. هاجرت القبايل لنهر النيل و استقر وضع الاقتصاد الزراعى و المجتمع المركزى.

تاريخ مصر المكتوب بيرجع لسنة 3200 قبل الميلاد بس كمان فى أدله كتيره بتأكد وجود حضاره و مدنيه فى وادى النيل قبل التاريخ المكتوب و اللى اتطورت فى شمال و جنوب مصر بشكل مستقل (ولكن مش منفصل تماما) لحد ما الملك مينا وحد الشمال و الجنوب و اسس دوله مركزيه حكمها ملوك مصر لمدة 3 الاف سنه تقريباً. المصريين سمو الدوله الجديده باسم (تا-وى) و معناها الارضين و ازدهرت الحضاره المصريه و فضلت شايله خصايصها المصريه البحته فى الفنون و المعمار و الثقافه بشكل عام طول المده الطويله دى.

بعد ما طرد احمس الهكسوس من مصر و اتعقبهم لغاية حدود منطقة سوريا الشماليه دخلت مصر فى طور حربى كبير و ابتدى ملوكها يوجهوا نظرهم للبلاد الاسيوية ففتحوا مناطق فلسطين و سوريا و وصلوا لغاية نهر الفرات و اتوسعوا فى الجنوب لغاية ما وصلوا للشلال الرابع فى السودان الحالى و كان اعظمهم فى الفتوحات تحوتمس الثالث اللى اسس امبراطوريه مصريه شاسعه. من الوقت ده بقت دى حدود مصر لما يحكمها حاكم قوى فكان بيوصل بفتوحاته شمالاً لمنطقة سوريا و جنوباً لأواسط السودان الحالى و ساعات كان بيتجه غرباً و بيضم منطقة ليبيا و فى البحر المتوسط كان بيضم لمصر جزر زى كريت و قبرص و ده كله بالإعتماد على قدرات مصر الاقتصاديه و قوة جيشها. من الحكام اللى ضموا الشام و الحجاز و النوبه لمصر كان احمد ابن طولون اللى قضى على الحكم العربى و من بعده الاخشيد و ضمت الدولة الفاطمية الشام و الحجاز و النوبه و اليمن لمصر ، و فى العصر الايوبى اتضمت لمصر جزر فى البحر المتوسط و فى عصر الدولة المملوكة ضم سلاطين مصر الشام و منطقة فلسطين و الحجاز وغيرها لمصر. اخر مره اتوسعت مصر فيها بالفتوحات كان فى عهد محمد على اللى فى ايامه كان لمصر جيش قوى قدر بيه انه يخضع كل الدول الافريقيه المطله على نهر النيل  و منها السودان الحالى و الحبشه (اثيوبيا الحاليه ) و الصومال و اغندا  و فى الشرق و الشمال منطقة فلسطين و الشام و الحجاز و جزر فى البحر المتوسط و هدد عاصمة الاتراك العثمانيون نفسهم فى تركيا عقر دارهم.

رغم طول تاريخ مصر و التحولات و التغييرات اللى حصلت على امتداده اتميز التاريخ ده بالاستمراريه و الدوام و فضلت مصر قوه ثقافيه و عسكريه كبرى فى منطقة الشرق  الاوسط .